CONTOH CERKAK

Nyalahake Pak Burhan

Dening: Diana Susanto

Jam wis nunjuk ning angka 06.50, iku brarti 10 menit maneh gerbang sekolah di tutup ananging Prayit iseh nyante nongkrong ning warunge mbok Jumirah udud-udud karo Durman,  ya bocah loro kuwi ncen ra ana tandingane sak sekolahan, kabeh bocah sak sekolah pada ngajeni kabeh, kecuali siji yaiku Rumi bocah wedok paling ayu dhewe primadona SMA GatotKaca,

“Mbok Jum, jam pira iki mbok?” Prayit takon rada nyante.

“Sek ya mas tak delok ” Mbok Jum mlebu warung, Prayit kempas-kempus nglanjutke udude maneh, ora let sue mbok Jum metu.

“Wah jam ku mati eh mas“. Mbok Jumirah mangsuli.

“Waduh jam mati kok isih dipasang to mbok?”.

“Lah iki jame mati durung sue mas, pandome wae tasih nunjuk 06.30”.

“Wah iseh isa nyante brarti ta bro”.Durman nambahi

 “nyante piye ta man? Kae jame mbok Jum mati, jal delok jam mu”

fuuhhhh, Prayit di sembur kukus rokok sek nembe wae di sedot

Durman, “semprul!! ngapa ta kowe?” Durman meneng wae, malah nyengir  “hehe”.

Si Prayit tan saya panas pitakonane ra di wangsuli “lambemu le nyengir kaya kethek kui lhoo”.

Krungu Prayit ngarani kethek Durman ya tetep nyengir, malah tan saya kecut “hehe 10 menit maneh bro”.

Ra nganggo suwe Prayit langsung gas pol beboncengan numpak ninja bareng Durman, karang jarak warunge mbok Jum karo SMA lumayan adoh, dadi Prayit numpake rada ngebut. Apa wae ning ngarepe di libas kabeh, sak  jane telat mangkat sekolah yawes biasa, ananging iki dina terakhir yen Durman karo Prayit kena poin, kue bocah loro bakal di depak seka SMA GatotKaca, di tambah maneh jam pertama yaiku jame Pak Burhan, guru matematika sek di kenal guru paling killer ning sekolah.

Saka mburi Durman nabok-nabok gegere Prayit, plak..!! plakk !!! Plakkkk…!!!

“Ngopo ta kowe Man nabok gegerku!!“ Prayit rada seru

“Ayooooo broo gas polllll”.

Saka adohan gerbang sekolah ketok ngawe-awe, ananging pandengane Prayit ora tumuju gerbang sekolah, malahan delokke Rumi sek pas kuwi ya padha wae telat. Prayit tambah alon ale numpak motor.

“Yayang Rumi ayo bareng aku, ngko ndak telat lho” Nada alus

“Bareng piye ta mas? Kuwi wong ana Durman og” karo mlaku cepet.

 “Ohh iyaya, aku lali hehe” nyengir alay.

“Kon ning tengah wae ngene bro” candhake Durman klisik-klisik marang Prayit.

“Ngapa kowe rang omong dhewe marang Rumi?”.

“Wahha ku grogi yen ngomong marang wong ayu” dumadakan percakapan Durman lan Prayit dipugel Rumi.

“Woy!! Pada ngomongke apa ta!!??”.

 “Hehe ra papa Rum” Prayit lan Durman mangsuli bebarengan,

“Ayo ngene tengah lho Rum, iseh muat kok” Prayit nambahi.

 “Hehehe” Rumi nyengir

“Wahhh manis tenan esem mu kuwi lho” Prayit ngledhek.

“Ora ngono mas, ki wes tekan ngarep gerbang lho hehe”.

Prayit lan Durman kaget yen percakapane karo Rumi ngasi tekan ngarep gerbang sekolah. Luwih bingung maneh merga gerbange wes di tutup. Banjur cah 3 kui ngrengek-ngrengek ning pak satpam, ora mung ngono malah Durman ngasi nangis-nangis. Nanging  pak satpam yawes mudeng polahe Durman yen kui naming sandiwarane Durman men bisa mlebu kelas, sebabe kedadean iki ora naming sepisan, nanging wis bola-bali dilakononi cah loro mau. Akhire naming Rumi tok sek bisa mlebu, mergane Rumi nembe wae telat kaping pisan.

Ora mikir sue Prayit langsung tancap gas,

“Lhoo kok malah mbalik bro?” Durman rada bingung merga Prayit malah mlipir mbalik.

“Ssssttt, tenang wae dhewe bias mlebu lewat pager mburi”.

“Llha iki motore piye?” Durman nambahi.

“Tenang wae ki motore dititipke neng pak Tono lho” Jare Prayit

Sakwise cah loro kui mau nitipke motor ning pak Tono, langsung wae menek pager ning mburi sekolah. Ra kepikir yen menek pager iku perkara gampang akhire Prayit lan Durman muter maneh lewat samping, sek pagere ora dhuwur nanging ana kawat wesine. Ora mikir sue Akhire pada nekat cah loro mau menek bareng, ananging nembe wae tekan ndhuwur Prayit lan Durman konangan pak satpam.

“Woy ngapa kowe pada liwat pager?”. Satpam nganggo nada dhuwur.

“Masa lewat omahe Pak satpam, ya kadohan ta pak?” Durman mangsuli karo nyengir.

Banjur cah loro kui lagsung mlumpat bebarengan, ananging prepeeeeeettt….. kathoke Durman nyanthel ngasi suwek rada amba, Prayit sek ning jejere ya lagsung ngguyu kepingkel-pingkel.

“Hahaahaha kui tutupi ndak ana sek ucul” Prayit karo nyengir.

“Ucul piye? Lha wong gerbange isih nutup kok” Durman rada nesu..

Sak wise lolos saka Pak satpam Durman lan Prayit langsung melesat ning kelas, nyambi nutupi kathoke sek suwek akhire tekan ngarep kelas, jebule Rumi ya urung suwe mlebu lan isih ngadeg ning ngarep kelas, banjur cah telu kui mau di introgasi bebarengan.

Pak Burhan takon “ iki cah telu pada niat sekolah pora!!? , kok pada telat kenangapa!? Saka Rumi, alesan mu apa?” Pak Burhan rada keras.

 “Anu pak, wau sak jane kula mboten telat ananging Prayit lan Durman ngganggu kula lho pak” Wangsulane Rumi.

”Ya wes kowe lungguh ngana” ngendikane pak Burhan.

“Matur nuwun pak”

Pak burhan takon mring Prayit lan Durman “kowe cah loro jebule biang keroke ta!?” Pak Burhan mandeng Prayit lan Durman. “Durman alesan mu apa?”.

Durman mangsuli “Sak jane kula mboten telat pak, nanging iki salahe jam’e Mbok Jumirah sek pejah pak”.

Prayit nyaut ”Hehh kowe gemblung pa? Jam kok di salahke”.

Durmann mangsuli ”Ya pancen ngono ta?”.

”Iya tapi ya aja jame sek di salahke ta?” Prayit njawab rada nesu.

”Banjur sapa sek salah?”. Pitakone Durman karo rada bingung.

Prayit njawab “Iki kabeh salahe Pak Burhan!!!!!!”.

Ujug-ujug suasanane dadi tegang .cah sekelas sek lagi padha lungguh kaget kabeh, ora mung kuwi swarane Prayit ngasi gawe manuk-masuk sek lagi pada nangkring neng wit-witan ngarep kelas padha mabur kabehh..

Pak Burhan takon “Kowe kok malah nyalahke bapak ki piye?”.

Prayit mangsuli ”La nggih ta pak, masalahe bapak mlebet kelas riyin sak derange kula mlebet, dados kula telat”.

Krungu omongane Prayit akhire cah sak kelas padha ngguyu kabehh.